Sunday, May 05, 2019

Dejjem, mhux biss fi żmien l-elezzjoni – Michael Briguglio


F'din il-kampanja twila għall-Parlament Ewropew, komplejt bil-ħidma tiegħi favur l-ambjent u l-ġustizzja soċjali, bħal m’għamilt f’dawn l-aħħar ħamsa u għoxrin sena.



Dwar l-ambjent, ktibt lill-Kummissjoni Ewropea dwar il-mod kif il-gvern qiegħed juża flusna biex jagħti l-art bl-irħis lill-iżviluppaturi kbar tad-DB f’Pembroke. Issa faqqas ukoll il-każ Corinthia, u bħal ma dejjem għamilt, u mhux biss fi żmien l-elezzjoni, ser nibqa' attiv biex l-art tagħna ma tintilifx. Malta mhijiex għal bejgħ.



Dwar l-enerġija, żvelajt kif, minkejja l-pompa, il-gvern ċaħħad lil Għawdex minn fondi Ewropej għal enerġija nadifa, fejn lanqas biss indenja ruħu japplika għal fondi speċifiċi għal gżejjer bħal Għawdex.



Dwar il-ġustizzja soċjali, ktibt lill-Kummissjoni Ewropea dwar is-serq fil-kontijiet tad-dawl u l-ilma. Logħba noli mal-Kummissjoni u l-awtoritajiet Maltin, iżda ftit tal-ġranet ilu l-Ombudsman qalli li lest jinvestiga l-kontijiet li tibagħtulu.



Din hija l-politika ‘on the ground’. Politika viċin in-nies dejjem, u mhux biss fi żmien l-elezzjoni.



Dwar id-drittijet tal-bniedem, ktibt lill-Kummissjoni Ewropea dwar it-teknoloġija li jrid juża l-Gvern biex ikollu dettalji privati tagħna. Każ ta’ ‘Big brother is watching you’.



Il-Kummissjoni tatni raġun u qalet li l-Gvern ma jistax jaqbad u jdaħħal din it-tip ta’ teknoloġija bl-addoċċ. Għalhekk qed niġri wara l-gvern biex ikun trasparenti.



Fil-Parlament Ewropew inżid dan it-tip ta’ attiviżmu f’isem il-Maltin u l-Għawdxin ta’ rieda tajba.  Għax jien nemmen f’Ewropa li hi viċin tiegħek, viċin il-gżejjer żgħar, u mhux Ewropa tal-elites maqtugħa min-nies.



Għażiż qarrej, forsi xbajt minn politika mixtrija. Forsi xbajt tara lil Malta tinbiegħ biċ-ċiċri biex igawdu l-ftit. Forsi xbajt tara lil min jgħum fil-liri filwaqt li oħrajn bilkemm ilaħħqu. Forsi xbajt tara saltna ta’ konkos li qed teqred l-ambjent u l-wirt tagħna.



Jien ukoll.



Bħal ma dejjem kont, u mhux biss fi żmien l-elezzjoni, ser nibqa’ nitkellem favur il-ħaddiema, il-pensjonanti, iż-żgħażagħ, in-negozjanti, il-klassi medja, l-uffiċjali taċ-ċivil, l-edukaturi u dawk kollha ta’ rieda tajba.



Ser nibqa’ nitkellem favur l-ambjent u l-ġustizzja soċjali.  Ser nibqgħu naħdmu flimkien għal pajjiżna.



Għalhekk, int li tħossok minsi jistħoqqlok vuċi. Inwiegħdek li l-vuċi tiegħek tinstema', dejjem, u mhux biss fl-elezzjoni.

Dan l-artiklu deher fil-Mument, 5 ta' Mejju 2019